Джеймс Уэбб ғарыш телескопының көмегімен алынған жаңа деректер 2024 YR4 астероиды 2032 жылы Аймен соқтығыспайтынын растады. Бұл Жердің табиғи серігі мен Жер маңындағы орбитадағы жасанды спутниктер үшін қауіптің жоқ екенін білдіреді.

2024 YR4 астероиды алғаш рет 2024 жылдың 27 желтоқсанында NASA жасаған ATLAS жүйесі арқылы анықталды. Диаметрі 60 метр болатын бұл нысан бастапқыда 2032 жылы Жерге соқтығысуы мүмкін деген қауіпке байланысты ықтимал қатер ретінде қарастырылған еді. Алайда қосымша бақылаулардан кейін Жерге ешқандай қауіп жоқ екені анықталды. Осыдан кейін мамандардың назары Аймен соқтығысу ықтималдығына ауысты, ол бұрын 4,3% деп бағаланған болатын.

2026 жылдың ақпанында мамандар Джеймс Уэбб телескопының көмегімен астероидты қайта бақылап, оның қозғалыс траекториясын нақтылап, Аймен соқтығысу мүмкіндігін толық жоққа шығарды. Есептеулерге сәйкес, астероид Айдың бетінен шамамен 21 243 километр қашықтықта өтеді.

Осылайша, Ай мен Жер маңындағы спутниктерге ешқандай қауіп жоқ. Егер соқтығыс болғанда, ол ядролық жарылысқа тең қуатта жарылыс тудырып, диаметрі шамамен бір километрлік кратер пайда болар еді. Алайда нақтыланған деректерге сәйкес, мұндай сценарий орын алмайды және соққы салдарын бақылаудың қажеті болмайды.